Жұлдыз Сүлейменова «Білім-инновация» лицейлерінің басшылығымен кездесті

Оқу-ағарту министрі Жұлдыз Сүлейменова «Білім-инновация» лицейлерінің басшылығымен кездесу өткізді. Тараптар білім беру сапасын арттыру, дарынды оқушыларды қолдау және үздік педагогикалық тәжірибелерді еліміздің мектептеріне кеңінен тарату мәселелерін талқылады.Кездесу барысында «Білім-инновация» лицейлерінің білім беру жүйесіндегі тәжірибесіне ерекше назар аударылды. Атап айтқанда, көптілді білім беру, жаратылыстану-математикалық пәндерді тереңдетіп оқыту, оқушыларды халықаралық және республикалық олимпиадаларға, ғылыми жобаларға даярлау, сондай-ақ білім мен тәрбиені ұштастыру бағытындағы жұмыстар қарастырылды.Талқылаудың негізгі бағыттарының бірі «Келешек мектептері» жобасы аясындағы ынтымақтастық мүмкіндіктері болды. Атап айтқанда, жаңа форматтағы мектептерде «Білім-инновация» лицейлерінің тәжірибесіне негізделген арнайы сыныптар ашу, тиімді оқыту әдістемелерін қолдану және педагогтердің кәсіби тәжірибе алмасуын ұйымдастыру мәселелері қозғалды.Сонымен қатар білім беру ұйымдары арасындағы әріптестікті нығайту, оқушылардың зияткерлік және шығармашылық әлеуетін дамытуға бағытталған тәжірибелерді кеңінен қолдану мүмкіндіктері талқыланды.