Қазақстанда ғылыми жобаларға грант қалай берілетіні анықталды

Қазақстанда ғылыми жобаларға грант қалай берілетіні анықталды

«Ғылым қоры» АҚ Басқарма төрағасы Әнуарбек Сұлтанғазин елімізде ғылыми жобаларға гранттардың қалай беріліп жатқанын айтып берді.

«Бізде грант беру шарттары толығымен заңды негізде іске асырылады. Грант беру тәртібі қарапайым. Конкурсқа қатысушылар мен ғалымдарымыздың бәрі бұл сөзімізді растай алады. Шарт бойынша жоба жетекшісі міндетті түрде Қазақстан азаматы болуы керек. Сол секілді жоба да Қазақстан аумағында жүзеге асырылуы тиіс. Гранттың сомасы - 300 миллион сомадан аспайды. Ғылыми жобаны ұсынатын команда жеті адамнан аспауы тиіс. Ол командада коммерциализация бойынша маманның болуы міндетті. Әлбетте, жоба үш жылға дейін іске асуы тиіс», - дейді Әнуарбек Сұлтанғазин. Оның айтуынша, «Ғылым қоры» АҚ белгілі бір ғалымның жобасына қаражат бөлу жағымен бірге, ол жобаның нарықта өз орнын табуына да көмектеседі. «Біздің әрбір жобаның өзіндік күнтізбелік жоспары мен сметасы бар. Күнтізбелік жоспар бойынша, 2018 жылдың 31 желтоқсанына дейін 6 жобаны аяқтап бітіруіміз керек болатын. Біз бұл жобаларды толық аяқтадық. Күнтізбелік жоспар бойынша осы жылы 31 жобаны бастаймыз», - деді ол. Еске сала кетсек, «Ғылым қоры» АҚ Басқарма төрағасы Әнуарбек Сұлтанғазиннің үш конкурстың нәтижесі бойынша мақұлданған жобаларға отандық бизнес өкілдері бұрынғыдан көбірек ақша бөле бастағанын хабарлаған едік. «Алғашқы конкурсқа бар-жоғы 337 жоба келіп түсті де, соның нәтижесі бойынша 32 жоба қаржыландыру бойынша қолдау тапты. Ал 2017 жылы өткізген конкурсқа 502 жоба түсті. Олардың ішінде 72 жоба қолдауға ие болды. Сонымен қатар, үшінші конкурсқа 431 жоба қабылданып, оның 78-і іріктелді. Осылайша, іске асырылған жобаларды есептеп отырсақ, үш конкурс бойынша мақұлданған жобаларға бөлінетін қаражаттың 40,3 пайызын бизнес өкілдері аударған. Демек, бизнес қазіргі таңда Қазақстанда ғылыммен жұмыс істеуге болатынына сенді», - дейді Әнуарбек Сұлтанғазин.

Дереккөз: inform.kz