«Жаңашыл мұғалім – 2020» байқауында «Тәрбие жұмысындағы АКТ» аталымы бойынша екі педагог жеңімпаз атанды!
Жас ұрпаққа білім берумен қатар жақсы тәрбие беру де маңызды іс. Тәрбие бала жанына мейірім мен ізгілікті орнықтырып қана қоймай, адалдық, әділдік, адамгершілік сияқты қасиеттерді сіңіреді. «Ұстазы мықтының ұстамы мықты» – дегендей, Отансүйгіштікке, бір-бірін қадірлеп, сыйлауға, үлкенге құрмет, кішіге ізет білдіруге келгенде әр оқушының санасына сол қасиеттерді жеткізе білу – ұстаздардың құзіретіндегі іс. Осы орайда мұғалімдерге кәсіби қолдау көрсетіп келе жатқан Bilim Land компаниясы «Жаңашыл мұғалім – 2020» байқауын ұйымдастыруда адамгершілік, отбасы құндылығы, патриотизм және интернет-мәдениеті сияқты маңызды тақырыптарды баланың бойына сіңіретін педагог-тәрбиешілерді мадақтау және қолдауға ерекше мән береді.
Биыл осы аталымда шығармашыл әрі бірегей жұмыс көп болғандықтан, мәреге қатысушылар арасынан жеңімпаздарды айқындау сарапшылар комиссиясына оңайға тиген жоқ. Сондықтан жүлдені екі қатысушыға бөліп беру жайлы шешім қабылданды.
Бірінші жеңімпаз – Залгаринова Алмагуль Имангалиевна, қазақ тілі мен әдебиеті пәні мұғалімі, «Өлеңті орта мектебі» КММ, Ақмола облысы, Ерейментау ауданы, Өлеңті ауылы. Педагог 2019-2020 оқу жылында түсірілген тәрбие сағатын Ұлы ақын, ағартушы Абай Құнанбайұлының 175 жылдығына арнаған. Тәрбие сағатында «Қазақ әдебиетінің аудио-хрестоматиясын», түрлендірілген әдіс-тәсілдерді тиімді қолданып, оқушылардың топтық жұмысын, бірін-бірі бағалау стратегиясын ұтымды ұйымдастырған.
Қазылар алқасы пікірінше, ұстаздық етіп, балаларға жалықпай білім беріп келе жатқан ұстаз ақпараттық-коммуникациялық технологияларды жетік меңгеріп, оларды тәрбие сағатында қолданудың озық үлгісін көрсете алды.
Екінші жеңімпаз – Серікбай Ерік Ниязбекұлы, информатика пәні мұғалімі, «Б. Майлин атындағы № 7 мектеп-гимназиясы» КММ, Қостанай облысы, Рудный қаласы. Серік Ниязбекұлы байқауға үш жыл қатарынан қатысып келеді. Педагог: «Қазақта «Ер кезегі үшке дейін» деген мақал бар. Байқауға үш жылдан бері қатысып келемін. Жыл сайын жұмыс жолдау арқылы кемшіліктерімді тауып, сол кемшіліктеріммен жұмыс жасадым. Жұмысымды жетілдіріп, кемшін тұстарын толықтыруға тырыстым» – деп, ой бөлісті.
Қазылар алқасының пікірінше, Серік Ниязбекұлы жұмысында роботехниканы, Twig-bilim.kz ресурсының бейнематериалын, QR-код арқылы сабақтың барлық кезеңін қызықты етіп өткізген. Оқушылар робот арқылы тапсырмаға жауап беріп, қызығушылықтары арта түсті. Экология тақырыбының маңызын, оны оқушы ойына оңай әрі түсінікті етуде ауқымды жұмыс жүргізілген.
Жеңімпаздарымызды мерейлі жеңісімен құттықтаймыз!
Сарқылмас шығармашылық шабыт тілейміз! Еңбектеріңіз игілікті болсын!
